"مرض نفسى ولا جن وعفاريت"، هو السؤال الذى تتعرض له دينا دائما، فمنذ شهور اكتشفت تصرفات غريبة بها وبطريقة أكلها مما جعل الكثيرين يخافون منها ويتهموها بالشعوذة وأطلقوا عليها "زومبى وخارقة" وذلك بعدما رأوها تأكل الزجاج واللحوم النيئة والسم.
قالت دينا شريف لـ اليوم السابع" انا بشتغل فى مطعم وكنت عايشة حياة طبيعية بس وانا صغيرة كنت بميل دايما لأكل اللحوم النية والأقلام الرصاص والطباشير بس كل ده مكنتش بعمله قدام حد حتى والدتى كنت باكل الفراخ واللحمة النية من وراها، بس عمرى ماكنت أعرف أن دى حاجة مش طبيعية".
وتابعت "مكنتش بحب ألعب زى البنات ولا ألبس فساتين وكنت بضرب الولاد دايما وشرسة معاهم، كبرت واتجوزت وخلفت وعيشت طبيعى لكن من كام شهر ظهرت عليا تصرفات غريبة، لقيت نفسى مرة واحدة واقفة على عربية ولقيتها جريت لوحدها استغربت يعنى انا عندى قوة خارقة مثلا!، فجربت وجبت عربية 6 طن ولقيتنى فعلا بجرها عادى، ولقيتنى كل ما انضف الفراخ واللحمة النية باكلها عادى وبحبها وبحس طعمها حلو، فتحت فيديوهات ولقيت أن دى حاجة خارقة أو موهبة واستغربت من نفسى".
وأضافت" واحدة واحدة جربت ادخل الشنيور فى جسمى ومتأذتش وجربت أكل زجاج ولمبة والسم اللى جوا اللمبة، طبعا فى الأول كل الناس خافت منى وأمى زعلت منى وقالتلى مجربش الحاجات دى تانى بس أقنعتها لأن ناس كتير كانوا فاكرين عليا جن وانا ولا عليا جن ولا ده مرض نفسى انا طبيعية جدا بس يمكن اللى عندى ده موهبة".
وتابعت "عندى تلت ولاد كانوا عاوزين يجربوا اللى انا بعمله بس انا منعتهم لأن ده خطر جدا ومبنصحش أى حد يعمل كدا، أنا نفسى استغل الموهبة اللى عندى وأعمل عروض ترفيهية فى السيرك ونفسى محدش يخاف منى لأنى طبيعية وبهتم بشكلى وشعرى وكل حاجة يعنى مش زومبى زى ما الناس بيقولوا عليا، فيه ناس بتقولى المرأة الحديدية وفيه ناس بتقولى عليا دينا الزومبى".
