"سيد الصابرين"، أو سيد المتعففين.. اسم أطلقه أهل منطقته عليه، بعد عشرة عمر، قدرت بعشرات السنوات، هو عم على "الصابر الراضى"، اللى رضى بقضاء الله وقدره، وصبر لحد ما علم كل اللى حواليه يعنى أيه صبر، تشوفه تحمد ربنا على حالك تسمعه هيبكيك على حالك.
وفى حلقة جديدة من برنامج "فتحى شو"، تقديم محمد فتحى عبد الغفار، دخلنا في حوار مفتوح مع عم على، البالغ من العمر 63 عاما، يذكرنا بأيام طفولته مسترسلا، " في سن الطفولة جاتلى حصبة أثرت على رجلى، وجابتلى شلل أطفال، من الوقت ده حياتى مش هقدر أقول إنها اتغيرت علشان أنا ملحقتش أمشى من الأول".
وتابع، "جم ناس قالوا لأمى أحنا هنعالج ابنك ببلاش، وبقينا نروح لهم 3 أيام في الأسبوع، لحد وفعلا بدأت أقف على رجلى شوية، وفى يوم روحت كان أذان الجمعة شغال، وانا قاعد مع الناس اللى بدات علاجى ولاقيت حاجة مسكت في رقبتى وروحى بتطلع فعليا لحد لما صرخت وقولت يا اماااااا، وجت امى خدتى وجريت بيا وخرجنا من المكان، وأمى وقتها عرفت أنى بموت وبقت تصوت وتقول ابنى بيموت".
واردف، "من وقتها عرفت أن ربنا عايزنى كده، وأنا لازم أرضى بكده، ولو مكنتش كده كنت هموت، وكل واحد واخد نصيبه على أكمل وجه، وقررت أنا وأمى منروحش المكان ده تانى، وشوفت الموت قدامى، ولما حد بيكلمنى عن الموت بقوله شوفته، واللهم إنا نعوذ بك من سكرات الموت، لأن الروح لما تطلع من الجسد بيكون في آلم رهيب".
واستكمل، "امى قالتلى انا حلمت بيك وانا حامل وانا واقفة عند الكعبة، وعرفت انك ولد، وجالى الرسول "ص"، وقالى خدى بالك من ابنك، وأنا روحت حجيت فعلا من رؤية أمى، وعايز أقولك اللى مش هرضى باللى ربنا قاسمه هيسلط عليه طوب الأرض، عمرى ما طلبت من حد حاجة ولو في ايدى الخير بقدم ولو معايا حاجة مستحقهاش بديها للى يستحقها".
