يا دموع قلبى على ناس جوه الخيام عايشين
تحضنهم قساوة البرد وحشهم دفا البطاطين
انفاسهم تدفيهم من بطونهم الخاوية جعانين
الفرشة ارض تراب بمطر الشتا تحتهم طين
يطلع النهار يدفنوا الرضع فى الغربة ميتين
***
يا دموع قلبى على ناس لاوطانهم مهاجرين
الوطن بيت كل قلب من الموت له مودعين
يبات معاهم الهم والغم على احوالهم حزين
شطبوا انسانية هويتهم فى تعداد المنسيين
فصيلة دمهم واحدة صرخة رحمه من انين
***
يا دموع قلبى على ناس بعد الامان مساكين
فى صفوف طويلة لمعونة العيشة منتظرين
حلمهم واحد يرجعوا للبيت ويعيشوا آمنين
لا يهمهم جنون اسعار والامن كحلهم للعين
كرامتهم تبقى التاج اغلى من عسل وطحين
***
يا دموع قلبى غياب التعليم ومنه محرومين
العيال لجرس الحصص وزمايلهم مشتاقين
وحشهم تحية علم بلادهم ونشيد الوطنيين
وطابور الصباح وللفصول بانتظام ماشيين
وتختة والطباشير وسبورة وزمايل قاعدين
***
يا دموع قلبى على غياب اصوات المدرسين
مدرس الحساب بعد تحية الكل كدا صاحيين
مدرس الالعاب بلبس الرياضة صف لتمرين
مدرس العربى يتمنى يكونوا زى طه حسين
وناظر المدرسة فى الفسحة يشرح لهم دين
***
يا دموع قلبى على الكورة غايبة بين فريقين
قدم سلة طايرة كمان سباحة منها محرومين
كل فريق له هتاف بسيمفونية كل المشجعين
الغالب يسلم على المغلوب بروح الرياضيين
يودعوا الملعب على وعد بالحب له راجعين
***
اولادى احفادى من الشهداء وكل المصابين
انا عايش الامن بكم زى الطير فوق ياسمين
امواتهم فى النار شهداءنا بالجنة فى عليين
يارب احفظ مصرنا وكل اللى عليها ساكنين
عايشه جوانا وبفضلها احنا بكرمها عايشين
تم أضافة تعليقك سوف يظهر بعد المراجعة