بعد حملة "بلاها لحمة" .. بدائل الست المصرية للفراخ بعد ارتفاع سعرها

يبدو أن الاستعدادات الرمضانية للأمهات فى هذا العام ستتطلب منهن عناءً كبيراً لم يبذل من قبل، فربما كانت المؤشرات تحمل فى طياتها كثيراً من عوامل القلق بشأن ارتفاع أسعار السلع الغذائية، لكنها لم تكن متوقعة أن تصل إلى هذا الحد، فقبل شهور ترددت أنباء عن ارتفاع أسعار الياميش هذا العام، بسبب وقف الاستيراد من سوريا، وبعدها بدأت أسعار السلع الأساسية فى الارتفاع بشكل تدريجى، ثم ظهرت أزمة الأرز والزيادة المفاجئة فى أسعاره حتى وصل سعره إلى 9 جنيه فى محال البقالة و 7.5 فى المجمعات الاستهلاكية، و حالياً تتربع أزمة الدجاج على عرش أزمات المصريين قبل بدء شهر رمضان بأيام بعدما سعر كيلو الدجاج لـ 27 جنيه ووصل سعر كيلو البانيه إلى 62 وفى بعض الأماكن وصل لـ 70 جنيه، حتى وصل الأمر بوجود حملات تدعو لمقاطعة الدجاج، لكن دائماً وأبداً تمتلك المرأة المصرية بدائلها الخاصة وخلطتها السحرية التى تتغلب بها على معظم الأزمات.

وسأل اليوم السابع "ستات" مصر عن بدائلهن لمواجهة أزمة الدجاج.

وقالت عبلة عيد 32 سنة" انا مستغربة ازاى الأسعار وصلت لكدةن وهستبدل الفراخ بالسمك واللحمة، لكن السمك هيبقى أكتر، وهحاول أقلل استعمالى للفراخ على أد ماقدر، يعنى الفرخة بدل مناكلها على مرة هتتاكل على مرتين، وبالنسبة للبانيه لأنه الصدمة الكبرى، هنبدله باللحمة المفرومة والبرجر هنعمله فى البيت او نجيبه جاهز، ولو نفسنا فيه اوى يبقى نجيب فرخة ونخليها أرخص، وهنقول ايه غير حسبى الله ونعم الوكيل".

أما سمية الهادى 35 فقالت "احنا من فترة استبدلنا اللحمة بالفراخ وبعدين استبدلنا السمك بالفراخ واللحمة، ودلوقتى بقى جه وقت استبدال الفراخ بالأسماك، يعنى ننوع فى عمايله، والبانيه نستبدله بالسمك الفيليه و كفتة السمك، وكمان ممكن نستبدله بالبرجر لأن معظم الأطفال بيحبوه، والفراخ تتاكل مرة فى الأسبوع، وبدل ما نقطعها على 4 قطع تتقطع على 8 ويتعمل نصها بطريقة والنص التانى بطريقة تانية".

أما هيام محمد 25 سنة فقالت "الاتجاه دلوقتى لازم يبقى للسمان الجوز منه مش بيكمل الـ 20 جنيه، وبيبقى طعمه زى الحمام بتغسل كويس وبيبقى تحفة، وطبعاً الأسماك الناس فى رمضان مش بتحب الأسماك وبتخاف من العطش لكن لو عملناها مع سلطات كتير ونوعنا فى طريقة الطبخ هتبقى تحفة، ده غير كفتة السمك اللى فيها فايدة كبيرة وبتعجب الأطفال جداً، وكمان الكبدة الشرائح ممكن تبقى بديل هايل عن الفراخ البانيه ده غير الفوائد اللى فيها، وسعرها مش بيوصل لسعر البانيه، والأسماك سعر الـ 2 كيلو البلطى مش بيكمل 30 جنيه يعنى أقل من سعر فرخة "، وأضافت "ولو فكرنا نجيب فراخ، يبقى لازم نعمل حاجتين الأول هنقسمها على نصين الصدور هتتخلى ونطلع منها بانيه وبكدة هيبقى وفرنا حوالى 30 جنيه من سعر البانيه، والوراك تتقطع كويس وتتطبخ لوحدها".

بينما قالت رنا رفعت 37 سنة" لازم الاتجاه الفترة الجاية يبقى للأسماك أولاً لأنها مفيدة جداً، وثانياً لأن أنواعها كتير جداً، و اللحمة المفرومة تبقى للكفتة والبرجر وبكدة تبقى بديل عن البانيه لأنه بيفرق مع الأطفال جداً".

وقالت أُميمة محمد 47 سنة "لو فضلنا عاملين أزمة عشان الفراخ عمرها ما هترخص، وعشان كدة لازم نخلى الأسماك فى المقام الأول لأنها سهلة فى العمايلن وفيها فوائد كتير ويتعمل منها الكفتة والفيليه، وكمان أسعارها رخيصة يعنى أسرة كبيرة ممكن تعمل أكلة سمك فيها نوعين بـ 50 جنيه، والفرختين دلوقتى بيعدوا الـ 100 جنيه".

موضوعات متعلقة:

بدء اجتماع شعبة المواد الغذائية لمناقشة أزمة الأسعار قبل شهر رمضان


بالصور.. موجة الحر تتسبب فى انتشار الفيروسات بمزارع الدواجن.. واستمرار ارتفاع أسعار الأعلاف نتيجة أزمة الدولار.. الأبيض يسجل 20 جنيها للكيلو بالمزارع.. وتوقعات باستمرار زيادة الأسعار فى رمضان