"بين جدران القاهرة".. مشروع تخرج يحكي تفاصيل الحضارة المصرية والأماكن الأثرية

إيمان حكيم الجمعة، 13 مايو 2022 05:00 م

"بين جدران القاهرة" حضارة عريقة تكونت عبر آلاف السنين ولكل جدار حكاية وتاريخ وأسرار ينبغي لكل مصري أن يعرفها ليدرك مدى عظمة بلاده منذ أبد الدهر، فمصر الحضارة والتاريخ والثقافة ومنبع الجمال والأصالة يأتي إليها السائحون من شتى بقاع الأرض ليستمتعوا بجمالها وتاريخها العريق، لذا اختار عدد من طلاب كلية الإعلام اسم "بين جدران القاهرة" ليعبر عن مشروع تخرجهم وفكرة مبادرتهم للترويج للمناطق الأثرية المصرية وتشجيع السياحة الداخلية.

 بنحب الأماكن الأثرية:

قالت الطالبة ندى عاطف: " إحنا بنحب الأماكن الأثرية جدا أنا وصحابي لأنها بتنقلنا لجو تاني وبنحب نسمع الحدوتة اللي ورا المكان ونعيش معاه الحكاية دي بتتعلق بالحاجات اللي حصلت في القاهرة قبل مئات السنين، للسبب دا حبينا ننقل كل المعلومات التاريخية عن المناطق الأثرية اللي بنزورها للناس ونخليهم يحبوا الأماكن دي زينا وأكتر، لاننا مهتمين بزيارة الأماكن الأثرية ومعرفة حكايتها ومعلومات عنها ونفسنا الناس تروح زينا ونقدر نبدل خروجاتهم من الخروجات بس في الكافيهات والمولات للأماكن الأثرية، وعشان كده بنعمل فيديوهات خفيفة نحكي فيها حواديت ونبين مدى جمال الأماكن الأثرية والتاريخية بهدف تشجيع المصريين على زيارتها.

الترويج للمبادرة:

وعن طريقة الترويج لفكرة مبادرتهم قالت هاجر سعيد: " استخدمنا السوشيال ميديا في نشر المعلومات التاريخية ولكن بصورة مبسطة توصل للناس بسهولة وتحببهم في تاريخ بلدهم وبدأنا نحكي الحكاية اللي ورا المكان ونظهر مدى جماله وعراقته وسبب اختيارنا للسوشيال ميديا هو إنها أقرب وسيلة للناس والتارجت بتاعنا هو الشباب وهما موجودين علي السوشيال ميديا ويقدروا يشوفوا فيديوهاتنا والحاجات اللي بنزلها بسهولة، كمان بننزل الشارع كلنا إحنا عددنا 12 طالب في المشروع ونبدأ نعرف الناس بالمبادرة ونشجعهم يزوروا الأماكن السياحية وبنوريهم الفيديوهات بتاعتنا".