أحمد صلاح حسني: لحنت أغاني مع عمرو دياب وحماقي وحققت نجاحا
حل النجوم أحمد صلاح حسنى وهبة مجدى وإيمان الشميطى، ضيوفا في الجزء الثانى من برنامج "سهرانين" للنجم والإعلامى أمير كرارة، المذاع على قناة ON، وتحدث أحمد صلاح حسنى عن كواليس عمله بالتلحين مع حماقى وعمرو دياب قائلا: "عملت أغانى كتير مع حماقى وشغلى معاه شيء ممتع لأنه صديقى وصاحبى جدا وشبه بعض في التفكير ومش بنختلف في المزيكا واللى بيعجبنى بيعجبه".
وتابع أحمد صلاح حسنى، عملت أغنية مع حماقى من كلمات أمير طعيمة اسمها مش قادر انسى، والأغنية دى لها قصة كنت مشغول جددا في التصوير وحماقى مشغول في تحضير الألبوم ومش عارفين نتقابل خالص، لأننا كنا عاوزين نعمل أغنية ومفيش وقت خالص، ولما اتقابلنا في مرة قالى أنا عامل جملة ومش عارف أعملها دخول وهو جرب كذا شخص ومعجبهوش، فقلتله طيب ولما شغلها حسيت إنها أغنية بتضحك، وروحت قايل دخلة الأغنية، ولما عجبته راح قايل غناها وأمير طعيمة كتب كلمات الأغنية في يومين وعملنا اللحن والأغنية عجبت الناس.
وعن عمله مع الهضبة عمرو دياب قال، كنت لسه في بداية فكرة التلحين ولقيت أمير طعيمة بيكلمنى وبيقولى أغنيتك لحنها عاجب الهضبة اللى هي أغنية "أنا معاك برتاح، وراح قالى خد كلم الهضبة وبعد ما كلمنى قالى سمعهانى كدة لأن الأغنية خطيرة في التليفون وتعالى اقعد معانا وانت جاى سمعهالى، وعجبته جدا وعقبال لما روحت لقيتهم بدأوا يوزعوها.