مطرود مع بناته بسبب فلوس الإيجار.. "حسام" هز مشاعر المصريين مع "فتحى شو"
"في ناس لو قعدت معاهم على الرصيف في الشارع بتكون أسعد إنسان في الكون"، هؤلاء هم أبسط البشر وأعففهم وأكثرهم قدرة على تحمل مشاق الحياة بكل قسوتها، تماشيا مع قول الله عز وجل "لا يكلف الله نفسا إلا وسعها"، ففي أجواء البرد القارس وجدنا طيب القلب "حسام"، وأبناءه الأطفال الثلاثة مفترشين رصيف الشارع وأبدانهم تنتفض من شدة البرد القارس.
وسأل الصحفى محمد فتحى المعروف بـ"فتحى شو"، أبو البنات "حسام" عن سر تواجده هو وبناته في هذا المكان رد باكيا، "أنا أول يوم اقعد هنا وعمرى ما عملتها وبموت ألف مرة وأنا قاعد هنا، خاصة إن ولادى قاعدين معايا في الشارع في عز البرد كده، بس اسيبهم فين ولمين انا ماليش حد، صاحب البيت رفض انه يرجعنى البيت تانى علشان 400 جنيه تأخير في سداد حقه في الايجار".
وتابع، "طلبت منه يدينى مهلة النهاردة انزل علشان اجمع فلوسه واجيب اكل لأولادى، اكيد هو برضه محتاج فلوسه، واكيد هو معتمد عليها في حاجة وده حقه، انا نفسى اشتغل ومش عارف اشتغل ازاى واسيب ولادى فين ولمين خاصة ان زوجتى مش موجودة معايا وبتتعالج دلوقتى في مستشفى نفسية لان عندها مرض نفسى، انا في السنة الجديدة ديه مش حاسس انها سنة جديدة".
واستكمل، "انا راضى بقضاء الله وقدره بس خايف على اولادى دول من السقعة والتشرد، نفسى في بيت يلمنا انا واولادى وشغل اشقى بيه عليهم واشوفهم احسن حاجة في الدنيا لان الضنا غالى اوى وربنا كريم وبثق فيه ومش هيسيبنى".