ابنة يوسف شعبان لـ لميس الحديدى: زعلت لما والدى فقد الوعى قبل ما أشوفه

حلت سايناى، ابنة الفنان الراحل يوسف شعبان ضيفة في برنامج "كلمة أخيرة" للإعلامية لميس الحديدى، المذاع على قناة أون، وكشفت خلال اللقاء على أسرار جديدة تخص والدها ووالدتها وقصة تعارفهما وزواجهما، قائلة: أنا ليا 3 أخوات من والدى، وكانوا معاصرين له طول الوقت، وهما اللى كانوا أولى يكونوا هنا، وأنا مكنتش موجودة علطول بحكم إنى كنت مسافرة مع أسرة والدتى دايما.

 

وأضافت سايناى، ابنة يوسف شعبان، وأنا صغيرة كنت بروح معاه الاستوديو أحيانا ومرة كان مسافر في تصوير في اليونان وقعدت معاه 5 أيام، كان وقت حلو جدا، وأنا بحب له حاجات كتير وبالأخص القديم، وبالذات اللى بيكون طالع شقى فيه؛ لأن ابتسامته جميلة، فكنت بحب أدواره في "بائعة الجرايد"، ومسلسل "الشهد والدموع" و"رأفت الهجان".

 

وعن لحظاتها الاخيرة مع والدها في فترة مرضه قالت: "جالي خبر إنه تعبان ومصاب بكورونا، وإنه خلاص أوشك على الدخول في غيبوبة، وروحت المستشفى، لكن للأسف كان خلاص فقد وعيه".

 

وكشفت أن آخر مكالمة جرت بينهما كانت منذ فترة أثناء وجوده في لبنان قائلة: "زعلانة أنه فقد وعيه قبل ما أشوفه بس أكيد كانت روحه حاسة بيا، وآخر حاجة قالها لى "خلي بالك من نفسك وابقي طمنيني عليكي".