خالد عليش بعد وصوله مصر من جنوب أفريقيا مع زوجته: ليه مصممين إن إحنا فى نكد
رد الإعلامي والفنان خالد عليش على الشائعات التي طالته خلال الأيام الماضية أثناء قضاء شهر العسل مع زوجته المذيعة ميرهان عمرو في جنوب أفريقيا، وكتب عليش فور وصوله للقاهرة، عبر حسابه بموقع "فيس بوك": "السادة الزملاء من الصحفيين والإعلاميين.. أنا مقدر جدًا لجهودكم أنكم توصلوا لمعلومة في إطار إنكوا بتطمنوا علينا، بس الواقع هو إن إحنا الحمد لله كويسين".
وأضاف: "حقيقي ما كنش في داعي للعناوين الرنانة والمصطلحات الغريبة شهر العسل "قلب غم" و"محتجزين" و"شهر العسل باظ"، لحد الوقت اللي بكتب فيه ده، إحنا بخير والاجازة بتاعتنا زي ما هي خلصناها قبل الميعاد بيوم بس والبرنامج السياحي عملناه كله.. ورجعنا الحمد لله وعملنا تحليل في مطار القاهرة قبل الدخول تطبيقا للاجراءات الوقائية الجديدة اسمه ID NOW وطلع سلبي الحمد لله وهنستكمل الإجراءات الاحترازية إللي تم إبلاغنا بيها من الجهات المختصة.. المصريين يقدروا يروحوا ويجوا جنوب أفريقيا عادي مع إجراءات وتعليمات".
خالد عليش
وتابع: "لأن مصر الطيران لغت رحلة واحدة بس اللي بتيجي وتروح جوهانسبرج ودي مكانتش طيارتنا أساسا.. ليه عايزين نكد وغم بالعافية.. إحنا بننزل ستوريز وبنضحك ومبسوطين، ليه مصممين إن إحنا في نكد، الستوريز والصور اللي بنزلها مش عشان تاخدوها تعملو عليها خبر، شاهد خالد عليش بيشرب عصير برتقال، ما ذنب القارئ ومدى الإفادة!! آخر خبر نزل من شوية.. أول مصري مصاب بالسلالة الجديدة علي طيارة خالد عليش".
واختتم رسالته: "أولاً أنا مالي بتحط اسمي في الخبر ليه؟ ثانيا معلوماتك غلط دي احتمال تكون الطيارة اللي قبلي بس الأكيد إنها مش طيارتي.. طيارتي فيها 12 راكب فقط جايين من جنوب أفريقيا كلهم طلعو سلبي.. أخيرا نتمني السلامة للجميع و اتباع الاجراءات المتبعة من الجهات المعنية".