سألنا البنات حبيبك الأولانى راح فين؟ فى يوم الحب الأول

كتبت شيماء سمير
الجمعة، 18 سبتمبر 2020 06:00 م

للحب الأول ذكرى كبيرة في نفوس كل من مروا به، لما يمتلكه من عذرية ومشاعر مجردة من أي أغراض، لذا يترك أثرًا واضحًا في شخصية صاحبه، وسواء اكتمل أم لا، فهو من العلامات الفارقة في حياة الجميع بذكرياته السعيدة والحزينة أيضًا، ويحتفل العالم اليوم بـ يوم الحب الأول، لذا طرحنا على الفتيات سؤالا "حبك الأول فين دلوقتي؟"، فدعونا نتعرف على إجاباتهن.

تحدثت "آية" لـ "اليوم السابع" عن حبها الأول قائلة: "كان حب اربع سنين وكان الكلام بينا قليل جدًا وجه اتقدملي وقرينا فاتحة وبقينا نتكلم كتير، بس طلع مفيش تفاهم خالص بينا، فسيبنا بعض.. هو كان انسان كويس ربنا يوفقه يارب، هو دلوقتي خطب وأنا اتخطبت لواحد تاني."

أما "أسماء" فقالت: "حبيته 4 سنين في الكلية وبعدها اتقرت فاتحتنا وكنا هنتخطب خلاص، لكن ما حصلش نصيب واتجوز دلوقتي ومعاه بنت اسمها رقية  وبيقولى طالعة شبهك."

وجاءت قصة "حنان" مختلفة تمامًا، حيث نشأت بينهما مشاعر منذ الطفولة، إلا أن أحدهما لم يصرح للآخر بحبه، وفرقهما الزمن 20 عامًا لم يعلما عن بعضهما البعض أي شىء، لتجمعهما الصدفة مرة أخرى، وعن ذلك قالت: "جالي في وقت كنت فسخت فيه خطوبتي، وكأنه طوق ربنا بعتهولي في الوقت المناسب، ودلوقتي اتخطبنا وبنجهز لجوازنا إن شاء الله."

وقالت "مروة": "كنا مع بعض فى الكلية.. هو مكنش حب قد ما كان تعود وإننا بنشارك بعض فى كل حاجة.. كنا شخصيات مختلفة وكنا برضه صغيرين مش عاقلين.. هو شخص كويس ومحترم، واتجوز من شهرين تقريبًا."