القارئ خالد فؤاد يكتب: أهم ما فى حياتك
أبوك وأمك وأخواتك دول أهم دايرة في حياتك، صدقني فراقهم مؤلم جدا ومفزع...
هتحس بيه لما تعمل كل حاجه لوحدك تفرح لوحدك تحزن لوحدك تاكل لوحدك هتعرف قيمتهم لما العيد يجي عليك وتصحي من النوم متلاقيش أمك علشان تقولها كل سنة وانتي طيبه مش هتلاقي اختك مجهزه لبسك ولا اخوك الصغير واقف علي الباب مستني العيديه .....
هتموت لما تدخل البيت تنادي علي أبوك متلقيش غير صدي صوت وقتها هتندم لو في يوم من الايام ضاع مع أبوك بسبب زعل او خصام بينكم
حبوا اهليكم ومهما عملوا فيكم سامحوهم ..
واستمتعوا بوقتكم معاهم والله في ناس دلوقت بتتمني ان ايامها ترجع مع اهليهم ويعملوا فيهم اللي هما عاوزينوا . مش هتعرف ان ابوك سند غير لما تتغرب ومتلقيش حد ينصحك ويطمن علي حالك من غير ما يكون ليه مصلحه معاك.
مش هتحس ان ابوك كان جبل شايل همك انت واخواتك غير لما يموت وتلاقي نفسك مسؤل عن كل حاجه في البيت.
مش هتعرف أمك أمان وأحن صدر وأوسع قلب غير لما تكون مريض ومتلاقيش يصحيك علشان تاخد العلاج...بلاش تخلي اختك تشوفك انك واحد عامل نفسه سي السيد .. خليها تشوفك ضهر يحميها وقت الضعف الاخت دي نعمه كبيره من ربنا بس اللي يصونها ...اخوك الكبير ده ابوك التاني ..اسمع كلامه علشان لما ابوك يعجز تشوفه شباب في اخوك .
اخواتك اللي اصغر منك.. كن ليهم قلب وقت ما العالم يضيق بيهم يلاقوا فيك الاب والاخ والصاحب .وزمان قالوا اللي مالوش غير في اهله مالوش غير في حد ..
يا رب احفظ اهلينا من كل سوء.