النهاردة 12/12.. سألنا الشباب عملتوا إيه فى آخر تاريخ مميز بالسنة

سما سعيد السبت، 12 ديسمبر 2020 01:25 م

منذ بداية العامًا الحالي 2020 ويسجل البعض التواريخ المميزة منتظرين ما سيحدث فيها بفارغ الصبر، ويعتبر اليوم 12/12 من الأيام المميزة لتكرار أرقامه، ويعد آخر التواريخ المميزة هذا العام، فقرر البعض عدم انتظار ما سيحدث، ويقومون بتغيير الواقع بأنفسهم لجعله مختلفاً عن الأيام الماضية من عام كورونا الأشهر.

 

البنات.. شوبينج وهعترف للكراش بحبى 

سألنا الفتيات عن أبرز ما قررن عمله هذا اليوم لجعل التاريخ مميزًا بالفعل فى حياتهن، فكان اتجاه أغلبهن إلى عدم انتظار المفاجآت وأن يفاجئن أنفسهن بطريقة مختلفة، فقالت آية.ا صاحبة الـ 25 عامًا: "النهاردة عندي كورس، هخلصه وأخرج أتفسح مع صاحباتي، وبفكر اعمل شوبينج"، وتابعت: "أكتر حاجة بتبسط البنات وبتغير مودهم هو الشوبينج خصوصاً لو مفيش ارتباط، أى حاجة نفرح بيها نفسنا". 

بينما هبة. م صاحبة الـ 28 عامًا قالت إنها على خلاف دائم مع خطيبها بسبب تجهيزات عش الزوجية، فقررت اليوم أن تجعله مميزاً ، فاتصلت بزوجها المستقبلي وأخبرته أنها موافقة على ميعاد الزفاف الذي أقروه مع بداية السنة الجديدة، وتابعت: "كنت دايماً باعترض على حاجات كتير خاصة بالزواج، فقررت النهاردة اعمل حاجة مميزة وعلى غير طبيعتي معه وهي أني مش هتدخل الفترة الجاية في باقي التجهيزات، منها عشان اخلص واتجوز، ومنها أريحه شوية لأنه الحقيقة تعب". 

أما منار. س صاحبة الـ 34 عامًا فقالت: "عندي كراش بينا وبين بعض نوع من التقارب والتفاهم، وأنا قررت أعترف له إني معجبة به"، وعن رد فعله واحتمالية أن يكون بالرفض قالت: "مفيش ست هتاخد خطوة زى دى غير وهى متأكدة إنه بيبادلها نفس الشعور"، وأضافت: "مش هتفرق مين اللي يبدأ المهم أن اليوم ده مش هيتنسى". 

 

الشباب..  انفصال وعزومة وسهرة حلوة

أما الشباب فكانوا مختلفين كثيرًا عن الجنس الناعم والكثير منهم لا يكترثون لهذه الفكرة، بل إن بعضهم لا يعلم فى أى يوم من العام، حيث تفاجأ محمد. م صاحب الـ 30 عامًا بأن تاريخ اليوم مميز ويجب فعل شيء مختلف عن الأيام الماضية فقال: "هخلص شغل وهروح أسهر مع صحابي، ده العادي بس يمكن يحصل حاجة فعلا تخليه مميز"، وتابع: "بإدينا نغير كل أيامنا للأحلى، إحنا بس اتكاليين، منتظرين اللي يفاجئنا، مع أن سهل نفرح نفسنا".

أما سمير. ع الشاب الثلاثيني فقال: "بما إني لأول مرة أعرف أن النهاردة يوم مميز، هكلم خطيبتي واعزمها على الغداء"، وتابع: "هتفرح جداً، البنات بيهتموا بالحاجات دي وكويس أنكم قولتولي".

أما عن الرد الأغرب كان من محمود. س صاحب الـ 36 عامًا الذي قرر الانفصال اليوم عن حبيبته بعد قصة حب استمرت لـ 3 سنوات، قائلا: "هى متطلعة جدا ومهما اعمل مبيعجبهاش، قررت إنى أدور على راحتي وسعادتي واسيبها تشوف حياتها زي ما بتتمنى"، وتابع: "وجود شريك حياة بيحبك زي ما انت بيخلى أيامك كلها مميزة، مش كل هدفه المظاهر والعربية يبقى نوعها إيه، نختار صح الأول وأحنا هنعرف نعيش أيامنا بشكل مختلف".