تعرف تعيش على حقيقتك؟
كلنا بنحاول نحسن من شكلنا قدام نفسنا قبل الناس التانية، عايشين فى عالم افتراضى بيسهلنا تجميل صورتنا بسهولة شديدة، حتى صورتنا مابقتش إحنا، بنلعب فيها علشان نطلع شكلنا أحلى، كل واحد فينا عايز يشوف نفسه أحسن الناس، بنعمل لنفسنا شكل ومنظر وحقيقة مبنية على خيال وأرض غير صلبة وبنصدق إن دى حقيقتنا فعلاً، مع الوقت القناع والشخصية الافتراضية دى بتصبح جزء مننا بجد.
خالوا بالكم إن مش كل الناس اللى أنتم عايشين فى وسطيهم وفاهمين أنهم أقرب الناس ليكم عايشين على طبيعتهم، المظاهر خداعة، كتير منهم بيداروا حقيقتهم وعيوبهم.
ناس كتير أوى بتتظاهر بأنها حاجة وهى العكس تماماً، هى بتكذب على نفسها قبل ما تكذب على الناس، مش وحاشة منهم هم بجد بيحاولوا يداروا على عيوبهم، بيحاولوا يتناسوا الحقيقة علشان يحسوا بسعادة وهمية. مهما حاولت تخبى ومهما طالت المدة الحقيقة لازم تبان، الكلام بيبقى سهل وفيه ناس الكلام لعبتها ومتمكنة منه، ولكن فى النهاية الأفعال هى اللى بتظهر حقيقة الشخص.
المشكلة إن النوع ده من البشر بيضر الناس اللى حواليه وبيحبوه زى أصدقائه وعيلته من غير ما يقصد، لأنهم فجأة بيكتشفوا إنهم عايشين مع حد مذيف، عندك مثلاً واحد ديماً عامل نفسه خدوم وجدع، كلام كتير ووعود أكتر ومع الوقت يكتشفوا إن كل ده سراب، يرفعك لسابع سما وفجأة يهبدك على أرض الواقع، كلام من غير فعل، الكلام سهل بس الأصعب والأهم إنك لما توعد توفى علشان ماتضرش اللى حواليك اللى هما فى معظم الأحيان بيبقوا أقرب الناس له وشايفينه مثل الأعلى. فصدمتهم فيه بتبقى كبيرة أوى وبتوجع أكتر.
فيه نوع تانى يحب يظهر نفسه إنه واضح وصريح وماعندوش حاجة يخبيها، حياته كتاب مفتوح، الناس شايفاه مثال للوضوح والأمانة والشفافية، ممكن يعيش سنين طويلة وهو مخبى حقيقته وحياة تانية هو عايشها عن أقرب اللى حوليه، ولكن الكذب مهما كنت شاطر فى أساليب الخداع حايجى يوم ويتكشف ولما يجى اليوم ده على هذا الشخص حايبقى أكتر واحد مش عارف يعيش مع نفسه، حقيقته قدام الناس حاتبرجله وتلخبطه، وممكن كمان تخليه يتهم الناس اللى حواليه إن هما اللى كذابين أو بيخترعوا قصص وهمية من خيالهم، هايكابر وينكر حتى النهاية.
الغلطة إنك تتظاهر بحاجة مش عندك، كلنا عندنا عيوب بنحاول نداريها وربنا بيسترها علينا كتير أوى، السعادة والنجاح مش إنك تبقى أحسن واحد المهم ماتبقاش مزيف، ماتحاولش تبهر الناس لإن فى النهاية كل حاجة بتظهر على حقيقتها، ومع الأسف مع الوقت النوع ده من الناس بيفقد احترام الناس ليه، الشخص المزيف عمره ماحيبقى صديق مخلص، خذوها قاعدة فى حياتكم.
أنت ممكن تعمل «فوتوشوب» لصورتك بس مش لشخصيتك!