محمد الهمايل يكتب: قبل ما ينطفى
من بعيد الضى لايح
له شعاع خابى الملامح
زى عود كبريت ف لحظة
يضوى قبل ما يبقى رايح
ف الضلام والبعد شاسع
قلت اروح له واهتدى
وسط ضلمة سكة جامح
صرت احسس خطوتى
وبعصايا دراعى ساند
عودى وامشى بخطوتى
والحصى ف السكة رامح
تحت دبة مشيتى
خطوة احس بحصوة تحتى
تبقى واقفه ف سكتى
خطوة امد ف رجلى وامشى
ألقى ريح بتهزنى
زى ما تكون الحياة
واقفة لىَّ ف لحظتى
ولسه قلبى ف كل دقة
قال هعاند دنيتى
همشى مهما السكة طالت
همشى اواصل رحلتى
نفسى اشوف ضى النهار
اللى ف البُعد ابتدا
زى ضوء خافت كإنه
زى عود كبريت لشمعة
قادها قبل ما ينطفى