نجلاء نعيم تكتب: لسان البوح
لا ألوم عليك حتى
ولا ع العتاب قادرة
كل الحروف سكتت
قطعت لسان البوح
انا اللى كنت ف يوم
جميلتك اللى قادرة
تداوى فيك الجرح
والقلب لو مجروح
وكنت لك درويش
والدمع كان حضرة
لكن فؤاد يعقوب
جواك عليل مدبوح
طلعت بيك السما
عمره ما كان مسموح
اترد لك يوسف
والسنبلة الخضرا
وانا اللى دمى برئ
على القميص مسفوح
أم الولد أولى
وإن كنت أنا العدرا
فمسيحى فيك اتمسخ
ولا اتنفخ فيه روح