عمرو أديب يعلق على أزمة سد النهضة: مصر تتحرك بشكل قانونى ودبلوماسى
علق الإعلامى عمرو أديب، على أزمة سد النهضة، قائلَا: "إحنا أصلًا عندنا فقر مائي، من غير سد النهضة".
وأضاف "أديب"، خلال تقديمه برنامج "الحكاية"، أن :"مصر دولة فى الفقر المائي وبقالنا سنين كده، إحنا دولة فقيرة مائيًا، ومصر بتتكلم في الأزمة بشكل قانونى ودبلوماسى".
وتحدث أديب، عن الاجتماع الذي عقد في فترة حكم محمد مرسي، بشأن هذه الأزمة قائلًا: "اديكم شوفتوا الاجتماع السري بتاع مرسي اللي ضرب كل بيت في إثيوبيا زي فيلم الكيت كات، وقالك المصريين عايزين يضربونا".
وواصل: "إمبارح بعد ما خلصت الحلقة لقيت حالة هيستيرية كده مكملة لحد النهارده الضهر، والغريب في الأمر إن الهستيريا دي من الشلة إياها، بيقولك أنتوا إزاي بتقولوا إن فيه مشكلة في سد النهضة".
وأضاف، : "يا جماعة عندنا مشكلة في موضوع سد النهضة، واللي بيتفرج عليا حفظ إنى بزن من سنين، وقلت إننا عندنا مشاكل مع إثيوبيا في الموضوع ده.. دى مفيهاش هزار، إحنا فعلًا عندنا مشكلة في المفاوضات وغلطتنا في المفاوضات إننا قعدنا معاهم كتير، بس مكنش بمزاجنا، لأن الناس اللي قاعدة على الطرابيزة اتغيروا كذا مرة، لكن مصر قالت كفاية كده، إحنا هنستنى لغاية إمتى؟ لغاية ما تخلص السد؟".