د. منال مكرم تكتب: مشاعر بريئة
جوايا ضحكة طفل صغير
بيعاند وبيعافر
بيشب على رجليه عشان يجيب أخر
أخر كل حاجة حلوة
وقت البكا تحتار تسكته
متهديهوش غير ضمته
أو صدر أمه لو ليها شدته
فرحته سرها أبسط أسرار الوجود
غفرانه ليك ملهوش حدود
معندوش وشوش يتغيروا وقت اللزوم
من بصة فى عينيه تعرف جواه إيه
بيكره الحيطان
ويحب هوا الشبابيك
يعشق المراجيح
ويدوب فى لمة صحاب
متقلوش يبوس مين ويحضن مين
ملوش فى المفروض ولا فى السدود
بيحركه صدق قلبه
وبتمشيه مشاعره
مشاعر بريئة ونقية
وقت الخصام مفيش أذى
أخره بيشد خط
أو ضهره يلف فى وش اللى صد
طفل برئ طفل جميل
ليه دايما بنسكته
وجوه دواليبنا بنستفه
ونشوهه بوشوشات الكبار
اللى لفوا وداروا
قال يعنى فهموا الأسرار
ميعرفوش أن ضحكة الطفل الصغير
اللى صداها يهز جدران الحزن المرر
هى اللى بتخلينا نقاوح
ندوس فوق كل صعب ونكمل