وائل عبد الودود حسين يكتب : عابر سبيل
سمعت صوت منادى
صوت من بعيد مش عادى
صوت يقول يا بشر
عيشوا الحياة قبل القدر
ما يجى ونبقى ماضى
لا تشغل بالك بزمان
ولا اللى راح واللى كان
لا تحمل هم بكره
تكبر فيها قبل الأوان
ده بكره لسه في علم الغيب
وأخاف منه لو يغيب
وكل واحد له كتابه
حتى اسمه له نصيب
الدنيا فيها حاجات حلوة
حاجات كتير مش شايفنها
ولا عارفين حتى قيمتها
غير أما تضيع كمان منا
والقلب يحب الجمال
مهما زاد العمر وطال
يدوق مراره ويرضى بعذابه
ولو كان حبه شىء محال
واليوم اللى يعدى عليه
من غير ما تعشق فيه عينيه
راح منى ومش راجع
غصب عنى ومش بأيديه
لا النوم طول فى عمرى
ولا في السهر قل صبرى
ده اللى كان مكتوب لى
واللي شفته كان قدرى
والحياة نعيشها مرة
على الحلوة والمرة
ولو سألونى عن نفسى
لا حول ليا ولا قوة
ممكن فى لحظة أرحل
أو أعيش سنين اطول
لكن أعيش اللحظة
بكل ما فيها دا الأجمل
أيام زى السحاب
وحياتنا ما لها إياب
تمر بسرعة وتعدى
ولا يقف قصادها باب
والدنيا غريبة أية مالها
مش راسية على حالها
لا تسلم لها وتأمنها
ولا تهجرها تبعد عنها
خليك فيها عابر سبيل
خلى قلبك هو الدليل
لا تخلى الفكر يحيرك
ولا يسهرك طول الليل
لا أنت عارف جيت لها ليه
ولا عمرك فيها قد إيه
لا تطاوع نفسك فيها
ولا تبكى وتحزن عليها
ويا رب باب رحمتك واسع
وفى رحمتك عايش طامع
عندى آمال لو كنت ضال
تقبل توبتى وانا ليك راجع
يا صانع كل ما فى الكون
أمرك تقول كن فيكون
بأيدك ملكوت كل شىء
إنا إليك راجعون