"عم صلاح ورقصة زورْبا".. محمد أبو الفضل بدران
زَى الأساطيرْ
وصلاحْ بيطيرْ
ووراه الجماهيرْ
حايمْ كالطّيرْ
والخِضر معاه وبْجَنْبه أهل السّيرْ
وبيرمى الجِسم النّحفانْ
فوق البركانْ
وتجيلُه قوّة "سِلَمانْ"
ربّك سخّرْ لُه الجانْ
والجسم النّحفانْ
فوق الملغوم بقنابلْ ورصاصْ
ما هو عايز يقتل كلّ الناسْ
وصلاحْ حَبس الأنفاسْ
عايز يفدى بنفسه الناسْ
من غدر الأنجاسْ
الوسواس الخنّاسْ
وجبال الوقت تلف ف إيده حريرْ
وصلاح بيطيرْ
ووراه الجماهيرْ
رقصة زورْبا وطوابيرْ
ويديهم زى المناشيرْ
وقلوبهم زى السواطيرْ
بيطلّعوا من بلدى الجانْ
اطلع يا جبانْ
من جسم بلادْنا
من ضُفْر ولادْنا
عم صلاح الحلوانْ
بيطلّع من بلده الجانْ
إنسانْ يا عم صلاح، إنسانْ
علّمت الدنيا عُمْر المصرى ما يبْقى جبانْ
لايهمّه العفاريت
ويْمَوّتْ بيديه الجان