رواد السوشيال ميديا يتساءلون: "إيه اللى جرالك يا إسكندرية".. سور كوبرى يسقط بالمارة وبلكونة تقع على تاكسى ويموت صاحبه.. وأحدهم يقترح: إحنا نلم من بعضنا ونؤجر طيارة هيلكوبتر ونبخر عروس البحر المتوسط ونذبح عجلين

كتب محمد تهامى زكى الجمعة، 12 يناير 2018 03:34 م

تعدد الحوادث على مدينة الإسكندرية الجميلة منذ بداية العام الجديد، بدأت بحادث سيارة ملاكى يقودها طالب، واصطدامه بـ3 شباب على كوبرى ستانلى، مرورا بسقوط بلكونة على سائق تاكسى فى منطقة محمد نجيب، حتى حادث انقلاب سيارة نقل ثقيل محملة بالأخشاب على سيارة ملاكى بالطريق الساحلى الدولى فى منطقة الكيلو 21.

ما بين هذا وذاك، اقتبس رواد مواقع التواصل الاجتماعى جملة الفنان الراحل خالد صالح فى فيلم ابن القنصل عندما قال: "مالك يا بلد.. جرالك إيه يا إسكندرية"، مقترحين بضرورة تبخير المحافظة لعل الحوادث تبعد عنها، حيث قال مصطفى مدحت: "إحنا نلم من بعضنا كده يا اسكندرانية ونروح مأجرين طيارة هيلكوبتر فيها مبخرة كبيرة وناخدها ونبخر بيها اسكندرية وكام محافظة كده جنبها ده لو فضل الطيار عايش أصلا".

وقالت سمر جابر: "انتو يا اسكندرانية لازم تبخروا البلد وقبل البخور تلموا من كل واحد فيكوا جنيه على الأقل وتجمعوا المبلغ وتطلعوا صدقه لوجه الله عشان كده عقبال ما تخلص 2018. هتكونوا خلصتو مع البلد"، فيما قالت أسماء البريمى: "الطف بينا يارب، بقيت أخاف أعدى الشارع من كتر الحوادث، إسكندرية عليها ندر".

أما محمد عطا الشافعى، فقال: "اسكندرية اتنظرت ولا إيه ياجدعان، من أول السنة كل يوم حوادث، يارب سلم سلم"، وقال عبد الله سالم: "ايه اللى حصلك يا بلد، ده من أول يوم فى السنة والحوادث على ودنه"، فيما قالت دودى على: "هى اسكندرية مالها، فى إيه بجد، حاجة غريبة جدا بتحصل فيها، يا ستير يارب"، وقالت ياسمين أحمد: "فيه إيه يا إسكندرية؟ مالك يا حبيبتى إيه اللى جرالك، اتحسدتى ولا إيه، اسم الله عليكى"، وقالت أوشا حاتم: "إسكندرية عايزة تتبخر يا جماعة، دى عين ورشقت، مش كده، كل يوم من أول السنة حادثة".

وقال حسن شاهين: "يا جماعة حد يفصل المودم بتاع إسكندرية ويشغله على نظام 2017"، فيما قالت رشا فوزى: "أنا مش عارفة إيه اللى بيجرا فى إسكندرية، فى اليوم 3 أو 4 حوادث، ربنا يحفظها"، وقال سعيد فاضل: "2018 ما شاء الله داخلة شمال على الإسكندرية حوادث وقولوا عادى، إنما توصل لحوت كمان"، فيما قال حساب باسم دقة قلب: "حد يبلغ محافظ الإسكندرية يذبح عجلين، كده مش هتعيش لشهر فبراير، كل دى حوادث فى 4 أيام بس، أهلا 2018 ولطفك يارب".