مفطّراتى .. سعيد شحاتة.. الحلقة 14
الجمعة، 09 يونيو 2017 06:00 م
مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
النول دا نولى.. والطول دا طولى
الله عليكى لمّا تقولى
هذا ضنايا... وردة حشايا
ابنى وحبيبى وشراع نجايا
ماشى باناجى.. ناسك واحاجى
على كلّ ورده.. من قلب عاجى
كاره وجودى... شايل قيودى
يا رب سلّم.. من اليهودى
رجّعنا سينا.. صمنا وقرينا
والجيش بتاعنا.. صانعة إيدينا
قوموا اسمعونا... يوم الطاحونه
لا خَدونا أسرى.. ولا «بارليفونا»
بارليف قصفنا... خافوا ما خفنا
واتفاجأوا بينا... لمّا اتنصفنا
داخلين بجيشنا.. صولنا وشاويشنا
فى حصون عدانا.. صولنا وناوشنا
ولا حدّ فيهم قدر يحوشنا
اصحى يا صاحى.. وافطر يا ضاحى
هذا أوانى... شاعر ضواحى
لفّيت حوارى.. ساعة العصارى
ومشيت أغنّى فوق الكبارى:
● ● ●
بلادى يا عشق الكتب والمراجع
يا خلّ الطريق وانتصاب المواجع
باحبك وباغلط فى حبك وأراجع
وبارجع فى عشقك واحب بغباوه
يا أحلى الحلاوه ف ساحات المناهده
رسمتى الحياه فوق ضلوعى البريئه
وصونتينى لمّا ابتديت المشاهده
بلادى يا شاهده
يا أول معاهده فى خلايا الملامح
باحبّك ومن كتر حبّك باسامح
● ● ●
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى