خيرى رمضان: بعض الوزراء اتصلوا بنواب البرلمان لمنع صدور قانون الاستثمار
شن الإعلامى خيرى رمضان، هجومًا على حكومة المهندس شريف إسماعيل، رئيس مجلس الوزراء، بسبب تأخر صدور قانون الاستثمار الجديد، قائلاً: "البلد دى فيها مشكلة ولازم الشعب ومسؤوليه يقعدوا تحت دش علشان يفوقوا.. ومحدش يصدق إن حكومة كاملة مش قادرة تعمل قانون من 3 سنوات"، مشددًا على أن هناك بعض الوزراء أجروا اتصالات هاتفية مع بعض نواب البرلمان لعمل جبهة مهمتها وقف إصدار قانون الاستثمار.
وأضاف "رمضان"، خلال تقديمه برنامج "آخر النهار"، على فضائية "النهار One": "بعض وزراء الحكومة لا يعلمون شيئًا عن السياسية، ولا يجيدون التعامل السياسى، ويبحثون عن مصالح وصلاحيات شخصية"، موجهًا رسالة للرئيس عبد الفتاح السيسى، قال خلالها: "يا سيادة الرئيس؛ هناك عددًا من الوزراء بيحاربوا علشان قانون الاستثمار مايطلعش، لأن فيه ميغة عندهم فى الوزارات مش عاوزنها تطلع.. رسالتى لرئيس الجمهورية: منذ مارس 2015 ونحن نتحدث عن قانون الاستثمار، ونحن الآن فى نهاية أبريل 2017.. بس اللى أنا متأكد منه إن مجلس الوزراء شاف إن قانون الرياضة أهم فى دخول مجلس النواب عن الاستثمار.. حضرتك يا ريس مهتم ببناء بنية تحتية، ومشروعات قومية، وتسافر يمين وشمال وتقابل اقتصاديين، ونقترض من كل مكان حتى نشجع الاستثمار".
وقال الإعلامى خيرى رمضان، خلال رسالته لرئيس الجمهورية: "مفيش منطق يقول إن بلد عندها أزمة اقتصادية ماعندهاش قانون استثمار، وكمان مجلس الوزراء يأجل قانون الاستثمار ويدخل قانون الرياضة لمجلس النواب.. ده منطق؟.. تغور الرياضة فى ستين داهية، الرياضة دى حتة بيزنس بايظ.. إحنا عندنا رياضة؟ ده إحنا ماوصلناش كاس العالم منذ 1990".
وتابع "رمضان": "مش عارفين نطلع قانون استثمار لمصالح خاصة لأن معندناش وزراء بيلعبوا سياسة، أو بيفهموا سياسة.. بعض الوزراء مش بتهمهم مصلحة البلد بل مصلحتهم وصلاحياتهم فقط.. بعض الوزراء بيكلموا نواب فى المجلس علشان يعملوا جبهة ضد القانون".