مصر وولادها وولاد ولادها

أم الدنيا آه، لكن أم ولادها لأ، تقرير برنامج الأغذية العالمى بيقول إن مليون وستميت ألف طفل مصرى يعملون، وبعضهم فى مهن خطرة لا يتحملها الكبار!

 

المليون وستميت ألف دول أكتر من تعداد سكان دول كاملة، عشان بس الناس اللى كانت بتدافع عن الحكومات الحرامية والفاسدة المتتالية فى السابق وبيقولوا المصريين ما بيشتغلوش.

 

إحنا دولة منهوبة، وكل كام يوم نقفش لنا فاسد كبير بـ100 ولا 200 مليون، وما خفى كان أعظم، فى ظل اقتصاد مريض، وفساد ممنهج، فطبيعى أن تغض الدولة الطرف عن العيال الصغيرين اللى بيشتغلوا حتى لو فى مهن خطرة، حتى لو اتصابوا أو ماتوا، عندنا منهم كتير، واللى يروح فطيس يوسع لغيره، وهو يعنى مصر هتبقى أحن عليهم من أبوهم وأمهم.

 

مش بس الأطفال الجهاز المركزى للتعبئة العامة والإحصاء قال إن عدد النساء المشتغلات فى مصر يبلغ 6.4 مليون امرأة عاملة، و%25‏ من الأسر فى أم الدنيا تعولها سيدة.

 

يعنى من الآخر نص الشعب بتصرف عليه ستات وعيال صغيرين، والرجالة ع القهاوى، والمسئولين السابقين كانوا مشغولين بتحويل حصيلة العمل العام لبنوك سويسرا، وربنا كبير.