تفاصيل 3 ساعات مناقشة بالبرلمان حول رفع تذكرة المترو.. وزير النقل: هنزودها لكن مش عارف كام.. ولو ما اتصرفناش دلوقتي هتبقى مصيبة وربنا هيحاسبنا.. اللهم بلغت.. ونائب: بلاش تقف فى مواجهة الغلابة
3 ساعات كاملة استغرقتها لجنة النقل بالبرلمان خلال اجتماعها اليوم الأربعاء برئاسة اللواء سعيد طعيمة، فى نقاش واسع حول سعر تذكرة مترو الأنفاق، فى حضور وزيرى النقل وشئون مجلس النواب ورئيس شركة إدارة وتشغيل مترو الأنفاق، انتهت إلى تأكيد وزير النقل على نية رفع سعر التذكرة.
وعرض وزير النقل هشام عرفات خلال الاجتماع أبرز المشكلات التى تواجه مرفق المترو، مؤكداً أنه عرض الموقف الخاص بالشركة على مجلس الوزراء بالتفاصيل الكاملة، والخطورة المتوقعة حال استمراره بهذا الشكل، متابعاً : "لو ما اتصرفناش دلوقتى، هتبقى قنبلة هتنفجر، والمترو هيقف، هنجيب منين وميزانية الدولة فيها مشكلة".
وأضاف هشام عرفات فى كلمته للنواب: " الخط الأول للمترو لو توقف البلد هتتشل، ولو سبناه بالشكل دا ربنا هيحاسبنا عليه يوم القيامة، أنا مش بلف وبدور، ومش بتخابث، أنا راجل واضح ودى مشكلتى، ولو تم إسناد إدارة شركة المترو لشركة قطاع خاص، التذكرة هتبقى بـ8 جنيه، وبالطبع الناس هترفض".
ورداً على غضب عدد من النواب حول الحديث عن رفع سعر التذكرة، عقب الوزير، :"أى وزير هييجى هيبقى مهتم يراضى الشعب، هل لديكم شك إنى مهتم بإنى ألاقى لنفسى شعبية، لكن فيه حاجات هتقع يا جماعة وضميرى لا يتحمل، أنا دخلت عش الدبابير، وعارف إنى هدخله، لكن ربنا هيحاسبنى".
ونقل الوزير تجربته فى أول يوم لعمله فى الوزارة، قائلاً: " أول يوم حلفت اليمين رحت الوزارة بمترو الأنفاق، ولقيت الناس بتوع عزبة النخل بيقولولى انت ليه لحد دلوقتى ما زودتش سعر التذكرة"، مشيراً إلى أن سعر تذكرة مترو الأنفاق بدولة الإمارات 3 دراهم، وعقب اللواء سعيد طعيمة رئيس اللجنة، : " هل هناك عندهم نفس الزحام زى عندنا".
واختتم الوزير كلمته، بأن الخط الأول لمترو لم يخضع لأى تطوير علمى منذ 30 عاما، وأن خطوط مترو الأنفاق تحتاج لأموال بشكل عاجل لعمل خطط للأمان، متابعاً: "خطوط المترو فيها مشاكل لو ما اتحلتش دلوقتى، هتبقى مصيبة كبيرة، واللهم بلغت اللهم فاشهد"، كاشفاً أن راتب سائق المترو 11 ألف جنيه، وأن حجم العمالة أصبح عبئا كبيرا.
وفى المقابل، رفض عدد كبير من نواب لجنة النقل حديث الوزير عن زيادة سعر تذكرة مترو الأنفاق، وقال اللواء سعيد طعيمة رئيس لجنة النقل بالبرلمان، فى حديثه للوزير خلال اجتماع اللجنة :" شركة المترو بتحقق خسائر ضخمة، وأنا دايماً بقول إن اللى بيخسر يروّح، الميكروباص الواحد بيأكل عيلتين وتلاتة، فما بالنا بمرفق ضخم مثل مترو الأنفاق".
ووجه النائب عماد محروس عضو لجنة النقل بالبرلمان، كلمة حادة لوزير النقل، رافضًا خلالها توقيع أى زيادة على سعر تذكرة المترو، قائلاً: "بلاش تقف فى مواجهة الغلابة، لابد من إقالة المسئولين عن إدارة المترو، ووضع استراتيجية بمعرفة سيادتك لإعادة التطوير، الناس مش متحملة، ومحدش هيقدر يتكلم".
واستطرد عضو لجنة النقل بالبرلمان، خلال كلمته موجهًا حديثه بغضب عارم للوزير، قائلًا : "لجنة النقل مش هتكون أبدًا محلل لزيادة أسعار تذكرة المترو، وإحنا وكل أعضاء اللجنة وكل النواب ضد أى زيادة أسعار الآن، حكومة شريف إسماعيل بتحل كل مشاكلها على حساب ذبح المواطن، والله العظيم الناس مش لاقية فلوس تركب مواصلات أصلاً".
وتابع محروس: "صحيح سعر التذكرة قليل، لكن الوقت ده غلط، الحكومة كده ماشية ضد توجهات الرئيس، وكل يوم بتخنق الناس، وكل يوم أعباء إضافية، واحنا مش عارفين نودى وشنا من الناس فين، أيوه الجنيه هيفرق مع رب الأسرة اللى عنده أولاد، مين الأسرة اللى هتقدر تتحمل عبء إضافى 400 جنيه فى الشهر".
كما شهدت اللجنة انقساما فى الرأى بين وكيليها، حيث اعترض وحيد قرقر وكيل لجنة النقل بالبرلمان، على رفع سعر تذكرة مترو الأنفاق، معلناً تنصله من قرارات الحكومة فى هذا الشأن، خلال اجتماع لجنة النقل المنعقد اليوم الأربعاء برئاسة اللواء سعيد طعيمه، وبحضور وزيرى النقل وشئون مجلس النواب، لمناقشة سعر تذكرة المترو.
وتابع "قرقر" فى كلمته التى وجهها لوزير النقل: "أقل موظف عندى فى الشركة النهاردة بياخد 6000 جنيه ومش قادر يعيش، المفروض واحنا بنعمل مشروعات كبيرة، نحافظ على البعد الاجتماعى، واحنا كبرلمان قلنا احنا مع الحكومة فى الإصلاح الاقتصادى".
وفى المقابل، قال محمد بدوى دسوقى الوكيل الثانى للجنة النقل، إن زيادة سعر تذكرة المترو ضرورى، مضيفا : " لما نتكلم عن البعد الاجتماعى، احنا كده بنحط السم فى العسل، لازم التذكرة تزيد، واللى خد قرار تحرير سعر الصرف يقدر ياخد أى قرار تانى، مش عاوزين نتعامل بالعواطف، وإلا مش هنلاقى المترو أصلاً، لازم التذكرة تزيد علشان المترو يقدر يكمل"، مقترحاً أن تكون سعر التذكرة 3 جنيهات تكون صالحة لمدة 24 ساعة.
واعترض عدد من نواب لجنة النقل على حديث "دسوقى"، وقالوا له : " اتكلم عن نفسك، خلوا التذكرة بـ 10 جنيه علشان محمد بدوى دسوقى يرتاح".
وفى نهاية الاجتماع، قال اللواء سعيد طعيمة رئيس لجنة النقل فى تصريحات للمحررين البرلمانيين، إن اللجنة سترجئ موقفها النهائى من قرار زيادة سعر التذكرة إلى اجتماع آخر بحضور الوزير، ودراسة مقترح مُفصل بشأن الزيادة وحجمها.