سيد منير عطية يكتب: ولا تعاتب
ولا تعاتب
حروف كدّابه بتنافق
ولا توافق ..
على اللى يقوله أهل الزيف
مافيش بعد النفاق تحريف
ولا بالكدب ييجى نهار
مافيش بين السما وانت
ببان مقفوله أو أسوار
ف حاول ف الحياة تختار
حروف الصدق عنوانها
تكون مفطومة ع الإخلاص
وحاول وإنت وسط الناس
تكون غيرهم
حذارى تبوش ف ألوانهم
حذارى تضيع
مافيش أبدا خريف وربيع
بيتقابلوا ويتسامروا
مافيش صادقين بيتآمروا
على دبح النهار بالليل
مافيش تأويل
لحرف الكدب عنوانه
وغامق كل ألوانه
سوى إنّه من الشياطين
ما عادش ملايكه بنى أدمين
عشان قلبك يصدّقهم
بلاش تسمع كلام منهم
ولمّا يقولوا ما تصدّقش
ح تسمع تلتميت معلش
بتيجى بتلتميت كدبه
ويفضل كدبهم لعبه
يعيشوا معاه ويتسلّوا
بياكلوا الكدب ويحلّوا
بكدب جديد على كيفهم
عشان يعدل مزاج كيفهم
ف كل دقيقه م الإدمان
دا بير مليان لكنه جعان
وكل يومين يعوز أكتر
بلاش تتغر ف المظهر
مدام جوّاك نهار أخضر
ياريت تقفل ببان قلبك
ولا تسمع كلام منهم
ولا تعاتب