مينا جميل يكتب: مسألتش
بقالك فترة مسألتش
أنا اللى الحيرة قاتلانى
وكل م أقول ف يوم هسأل
بقول أستنى يوم تانى
وبستنى.. ف مبتسألش
بلاقى مشاعرى وجعانى
بلاقى صراع ..
نسيت !!؟ .. نسيت الضمة
ف الوحدة
نسيت حلمك رسمته إزاى
نسيت المشى من شبرا لـ قصر النيل
وصوت الناس وطعم الشاى..
نسيت أشعارك الحلوة وصوت الناى
نسيت النيل وتنهيدى
وإيدك دايبة بين إيدى
وصوت أنفاسى وعنيا
وطبطبتى بحنية.
ودمعك وقت م بتضعف
وأكون سندك
واشيلك جوة ف عنيا
نسيت الورد ف عز البرد
ولما كنت بشكيلك مرار الكاس
من العالم يا أغلى الناس
أنا مش بنسى ولا لحظة...
بكون عايشاها بالإحساس
بقالك فترة مسألتش
وأنا اللى الحيرة قاتلانى
وكل م أقول ف يوم هسأل
بقول أستنى يوم تانى