راندا جاد تكتب : عاهات وآهات " 2 "

الأحد، 15 أكتوبر 2017 08:00 ص

الست اللى بتقلع الحجاب زيها زى الراجل اللى بيهجر بيته ومش بيصرف على أولاده هم الاتنين ضحية.. ضحية مجتمع فرض عليهم وضع هم مش عاوزينه.. لا الست كانت عاوزة تتحجب هى اما إن اهلها حجبوها وهى صغيرة او كبرت فى مجتمع اجبرها تتحجب زى أصحابها او اتحجبت علشان تتجوز وجوزها حجبها، المهم انها ما اتحجبتش علشان مقتنعة بالحجاب و تنفيذ لأمر الله عز وجل ..

 

اما الراجل اللى هجر بيته هو مكانش اساسا عاوز الجواز بس المجتمع اجبره يتجوز لأنه لو مااتجوزش حيتقال عليه كلام كتير مرورا بحالته الصحية وخوف الأسر من السكن بجواره لأنه أكيد حيكون ماشى فى الحرام والأسوأ انه حيتم اتهامه بالرينبو زى ما المجتمع اتهم بعض الاعلامين والفنانين اللى مش متجوزين .

 

لو كنا علمنا اولادنا الصح والغلط وسيبنا كل واحد يقرر مصيره كانت البنت اللى عاوزة تتحجب إيمانا وتقوى حتتحجب ومش حتقلعه، وكان الراجل اللى مش عاوز يتجوز عايش سعيد ومش ظالم ست معاه وأولاد يسيبهم .

حاسبوا أنفسكم قبل أن تحاسبوا الناس.