سيد منير عطيه يكتب: قومى
قومى يا شايلة الهموم
استحمى ف نهر نيلك
كله كوم والحزن كوم
إوعى أحزانك تشيلك
مهما عنّك فرح غاب
عدّى فوق المستحيل
لسّه أحلامك شباب
لسّه ف عيونك دليل
هِدّى سور الحزن هدّى
فوق جبال الهم عدّى
ياللى أقوى من التحدّى
نادى ع الأفراح تجيلك
واستحمّى ف نهر نيلك
***
ياللى ساكتة ما تسكتيش
وارفعى جبينك كرامة
داللى راح ما بيتنسيش
واللى جى محتاج علامة
تاخدى تار الحق م اللى
دبحوا صوت الحق فيكي
كل شبر وكل مللي
من ترابك بيناديكي
إصحى تانى وصحصحينا
ارفعى بإيدِك إيدينا
يا وطنّا وعايشه فينا
كُلّنا حافظين جميلِك
قومى يا شايلة الهموم
واستحمّى ف نهر نيلك
***
إللى مات بإيدين خواته
هاتى حقُّه من الخوات
واللى جوّه الجُحر باتوا
إهدمى جحور الأفات
إللى حاولوا يعطّلوكي
إدفنيهم تحت قدمك
واللى للأحزان جابوكي
إهزميهم بابتسامتِك
واللى عاشوا تحت شمسك
بس جابوا البرد عندك
حطّى راسهم تحت رجلك
خلّى من إسمك دليلك
قومى يا شايلة الهموم
واستحمّى ف نهر نيلك