بهاء الدين محمد لعمرو مصطفى: هجومك على شيرين تهور غير محسوب
وجه الشاعر الكبير بهاء الدين محمد رسالة إلى الملحن عمرو مصطفى من خلال صفحته على موقع التواصل الاجتماعى فيس بوك قال فيها "أولا: فوجئت على أكثر من موقع إعلامى وصحفى إنك ذكرت اسمى واسم الأستاذ المنتج نصر محروس كشهود على وقائع لم تحدث وإدعاءات غير صادقة تمس شخص الفنانة المطربة شيرين عبد الوهاب بصورة غير حضارية ولا فنية" .
ثانيا : على ما أتذكر إنك ماكنتش لسه موجود كملحن فى الفترة اللى بدأت شيرين فيها وجودها الفنى ولو كنت موجودًا كملحن فى بدايتك أظن من الصعب على شخصى وشخص نصر محروس إننا نتحايل عليك تسمع صوتها وهذا كلام غير صحيح، ومش ح اتكلم عن الكلام التانى اللى أنت كتبته عن شيرين وتناولته المواقع والصحف اللى مايصحش أكرره تانى لعدم صحته ولبواخته وتهوره" .
ثالثًا: شيرين عبد الوهاب مطربة لها مكانتها ووجودها اللى أظن هجومك عليها بالأسلوب والمستوى ده كان تهور غير محسوب!
رابعًا: نصيحة من أخ أكبر ليك: ماتخسرش المحترمين بتهور لأن الدنيا مابقاش فيها ناس كتير يستاهلوا نحافظ عليهم، وماعندناش نجوم كتير ف نفس المكانة.. والمفروض فنان باسمك وحجمك لازم يحاسب ويحافظ على صورتنا وصور نجومنا قدام الناس والوطن العربى وأخيرًا منتظر منك الاعتذار للجميع لأنى أثق إنك بتحترم الكبار" .
خامسا: اخترت ردى يكون بنفس الاسلوب اللى اتبعته فى هجومك على شيرين وذكر اسمنا كشهود على وقائع لم تحدث، وفى انتظار اعتذار الفنان اللى جواك" .