من لم يمت بالتعليم.. مات بغيره
من لم يمت بالتعليم.. مات بغيره
وكأن الإصابة بالتسمم من المناهج، ومن محدودية عقول المدرسين والمسؤولين عن وزارة التربية والتعليم، ليس كافيًا، أصيب 50 تلميذًا بالمرحلة الابتدائية بالتسمم فى مدرسة سالم الزينى الابتدائية بقرية كوم القناطر التابعة لمركز أبو حمص بالبحيرة، بسبب وجبات مدرسية فاسدة، يعنى حضرتك وأنت بتبعت ابنك المدرسة متعرفش المصيبة جاياله منين، وما تضمنش أصلًا يرجع لك ولا لأ، وللأسف مفيش أى أمل، ولا أى حاجة تقدر أنت أو غيرك تعملها، خلى أمه تدعيله.
ربنا يزيد رزق الحملات الأمنية
حملة أمنية مفاجئة بالبحيرة تسفر عن ضبط 15 شخصًا بحوزتهم أسلحة ومخدرات، و177 متهمًا هاربين من تنفيذ 1560 حكمًا قضائيًا بالحبس، و2214 مخالفة مرورية ورفع 423 إشغالات ثابتة ومتحركة، اللهم صلى ع النبى، كل ده فى حملة واحدة، وبالصدفة، إيه ده، ده لو ماشيين فى زنزانة مش هيلاقوا كمية الإجرام ده كله، ربنا يكون فى عون الـ17 بنى آدم المحترمين الباقيين فى مصر.