بيتر نجيب سعيد يكتب: لو كل حاجة
دى صعبة
ودى مفهومة وباينه زى الشمس
ودى محتاجة تفكير
ودى تتحس باللمس
ودى لايقة عليك
ودى لو تخنت حبة .... تضيق
ودى مُرة زى العلقم
ودى حلوة تجرى الريق
ودى لازم تاخدها بالمقاس
بس دى من حلاوتها تتباس
يمكن دى أحلى
أو دى فـ الآخر تحلا
ونفضل نقلب فـ حاجات
يمكن نلاقى الحل
نسرح عشان القلب من الحيرة.. مَلَّ
وعادات تسلم عادات
والحياة بتمر
ووش الدنيا يبان
وفايدة تبانلك من كتر الشك تضر
ومن حزن لفرح .. لفرح لحزن
وخيط الدنيا يكُر
والحياة بتصعب
فى قرار صعب وفى الأصعب
رغم إنى
أوقات لو عرفنا كل حاجة نتعب