ومازال النيل.. يبكى
ومازال النيل.. يبكى
والله العظيم اللى بيحصل فى النيل ده حرام، يعنى ربنا يدينا نعمة تتمناها بلاد كتير، فاحنا نتفنن ازاى نلوثه ونوسخه ونتعدى عليه، ونحرم الناس منه بوضع اليد والبلطجة ومخالفة القانون، لدرجة إنك فى قلب القاهرة مستحيل تشوف النيل إلا من فوق الكبارى، بسبب المطاعم والكافيهات العائمة والنوادى، وتسأل عن الحكومة، وهى دورها إيه بالظبط فى القصة دى، يجيلك الرد: وهو كان فى دورها فى أى حاجة أصلا، فتضرب كف بكف وتسكت.
راح فين زمن البلطجة؟ .. موجود عادى جدا
يا أخى تشوف سواقين التاكسى الأبيض اليومين دول يصعب عليك حالهم، وتفتكر أيام ما كانوا فاردين قلوعهم، وعاملين إضرابات ومظاهرات وموقفين الشوارع اعتراضا على أوبر وكريم، ومتأكدين جدا إنهم هيقفلوا الشركتين بالبلطجة ونصب كماين لسواقين الشركتين والقبض عليهم، بس خلاص، الشركتين اتقننوا واشتغلوا، وبقوا مش بس بينافسوا التاكسى الأبيض فى الرزق، دول كمان بينافسوهم فى البلطجة والاشتغالات، وشكرا للتاتش المصرى.