سمير حافظ النواجى يكتب: هى كده الدنيا
وهى كده الدنيا
ناس عايشة وناس فانية
فيه ناس بتبنى تعلى لفوق
وناس فى دماغها حاجة تانية
ناس فى قلوبها زارعة الخير
ونفوسها صافية زى الطير
وناس فى قلوبها طالع حيل
وطمعانة بس فى الدنيا
وهى كده الدنيا
,,,,,,,,,,,,,,
وناس فى قلوبها زارعة الشوك
وعنيها باصة بس لفوق
وناسية إن دى دنيا
وتيجى تلومها وتعاتب
ترد بعينها والحاجب
وتقول علينا مناخوليا
وهى كده الدنيا
وناس معاها ومرتاحة
وفلوسها تملا كساحة
وجيوبها تبقى مليانة
وفراغة عينها فضاحة
وناس فى دموعها غرقانة
من عيشة ضنك ومهانة
وم الفقر ماشية عريانة
وتبقى بتلوى من جوعها
بس بعزة نفس شبعانة
وناس بتقَسم فى لقمتها
وتقول فى اللمة حلاوتها
وعلشان ربك الرزاق
بيزيد أكيد فى بركتها
وهتفضل كده الدنيا