عبد الرحيم المرشدى يكتب: من مفكرة أكتوبر

الإثنين، 10 أكتوبر 2016 10:04 ص

اللى خط بالقلم

فوق رمال الصمت

وبأول كلمة اتكلّــم

أول غنوة غنّى واترنّم

أول من رفع العلم

على أرض الحلم وعليها سلّم

هو مصرى ..

على جبين الكون علّم

*****

دا حب الوطن ..

ما يتقدرش بتمن

أغلى من كنوز الزمن

أحلى من جنة عدن

*****

اللى رفع العلم ...

هو مين .. هو فين

هو اسم ف دمنا..

حلم فى حلمنا..

عمرنا ما ننساه

قلبنا دايما ويّاه

ودّعناه .. وما ودّعناه

حتى لو اسمه ماعرفناه

اخد رتبة فوق الأسامى ..

اخد حب يزيد عن الكلامِ

 *****

كل واحد كان بيحارب ..

كل واحد جعل من جسمه قارب

من حمل السلاح وكبّر

من نادى بالصباح وعبّر

كل واحد من جنودنا ..

هو ف نفسه أسطول وأكتّر

هو ف نفسه جيش وأخطّر

جواه العزيمة ..

هزمت الهزيمة

*****

عدى القناه ..

وقال يا سينا ..

عمرنا ما نسينا ..

شجر التين طرح أياتى

بزيتونك مصابيح ذكرياتى

دا فى موتى عشانك حياتى ..

يا أحلى أغنياتى ..

يا سينا ...