دينا أنور تكتب: أنا اسمى مش عورة!!!!!
طول عمرى أسمع مصطلح عورة ده، وارتباطه الوثيق بالمرأة خصوصا إننا شعب متدين بطبعه!!! وطبعا أنا زى غيرى من البنات اتعودنا نسمع مصطلحات: جسمك عورة، شعرك عورة، صوتك عورة، لكن اللى فعلا بيخلينى استغرب هو أن مجتمعنا بيعتبر كمان أن اسم المرأة عورة!!!! تلاقى الراجل من دول لما يحب ينده لمراته فى الشارع يقولها يا أحمااااد، يا محمااااد كأنه لو ندلهها باسمها لا سمح الله اسمها هيتلوث؟! تلاقى الست لما تتصل على جوزها فى الشغل وواحد زميله يرد عليها يقوله كلم البيت!! حتى لو يعرف اسمها!! ويا سلام بقا ع الستات نفسهم وهما مؤمنين بنفس الأفكار وبيطبقوها أحسن من الرجالة، تلاقى الست مثلا قاعدة مع صاحباتها فى مطعم وبتطلب أكل ييجى الجارسون يقولها الشيك باسم مين يافندم؟ تقوله على طول اسم جوزها أو ابنها !! مش فاهمة ليه؟؟ هو اسمك يكسف للدرجة دى!! ده غير بقا طلبات السوبر ماركت فى التليفون، مع أن العرف السائد فى مجتمعنا الشرقى أن الست هى المسئولة مسئولية كاملة عن طلبات البيت والأكل إلا أن برضه لما يطلبوا اسم ورقم تليفون يسجلوه تلاقيها بدون وعى بتديهم اسم جوزها ورقمه،مع أن هيا اللى هتستلم الطلبات وتراجعها،وممكن جوزها يكون مش فى البيت أساسا؟!! ده غير بقا البواب والمكوجى وبتاع الغاز وغيره وغيره كلهم لازم يتعاملوا مع إسم الراجل حتى لو كانت الست هيا اللى بتتعامل معاهم فعليا. تعالوا بقا نروح مع بعض مكان شعبى أو ريفى واتفرجوا معايا على كم الإهانة اللى بيشعر بيها الولد لما حد يندهله بإسم أمه!! لدرجة أن فى بعض المسلسلات والأعمال الدرامية بيجسدوا الواقع ده ساعات فى وقائع التعذيب أو التنكيل بشخص ما بسؤاله إسم أمك إيه!! كأنهم لو أجبروه يقول اسم الست اللى جابته للدنيا يبقوا كده بيهينوه!!!! ولو دخلنا بقا فى التكنولوجيا أحب أقولكم فى كام ست عالفيس بوك ومواقع التواصل الاجتماعى المختلفة مسمية نفسها باسم وردة أو ممثلة أو حد من ولادها إما بتعليمات من جوزها اللى اشترط عليها لو عاوزة تعمل فيس ماتكتبش اسمها، أو بدافع شخصى منها لأنها إتعودت تطمس هويتها عن الناس!!!!! حتى فى الأوساط الراقية تلاقيهم يقولوا حرم سيادة السفير فلان، حرم رجل الأعمال فلان،كريمة اللواء فلان،بجد والله حاجة غريبة جدا!!! وتعالوا بقا معايا ننزل شوية للطبقة تحت المتوسطة اللى فيها سيدات مكافحات بيشتغلوا ويفتحوا بيوت زى الراجل وأكتر، تقابلى الست منهم وتعجبى بكفاحها تيجى تسأليها عن إسمها تقوللك أم فلان؟! ليه ياستى مالكيش إسم؟ تلاقيها تستنكر جدا سؤالك وتلاقيها كلها تصميم إنك تندهيلها باسم ابنها أو حتى بنتها لأنها تقريبا ما أتعودتش تسمع إسمها غير وهيا بتخلص ورق حكومي!!! وأنا بصفتى واحدة من جنس حواء اللى مايتسماش، نفسى بجد أسأل المجتمع إيه المشكلة لما الناس تعرف اسمى؟؟ إيه الإحراج اللى ممكن أسببه لزوجى أو إبنى لو الناس ندهتلى باسمى؟؟ ليه الست دايما محرومة من أبسط حقوقها حتى حقها إنها تسمع اسمها؟؟ ليه لازم اتنسب لراجل؟؟ أظن أن العصر اللى المرأة أصبحت فيه دكتورة ومهندسة ومحامية ومحاسبة ومدرسة وإمرأة عاملة وحظيت أخيرآ بحقها إنها تكون قاضية ،عيب قوى نعامل فيه نفس ذات المرأة دى بكل هذا القدر من التهميش والإزدراء. أنا هبدأ بنفسى وهرفض كل محاولات المجتمع الذكورى لسلبى حقى فى سماع اسمى، حتى لو كان كل الرجال اللى فى حياتى مهمين وما أقدرش استغنا عنهم، بس فى نفس الوقت لازم أعرف أن أنا كمان مهمة جدا بالنسبة لهم، زى ماهما محل فخر ليا أنا كمان لازم أكون محل فخر ليهم. أنا هقول اسمى لبتاع السوبر ماركت والمكوجى ولأى حد، ابنى لازم يحس إنه محظوظ لما يقولوله انت مامتك فلانة، جوزى أوبابايا أو أخويا لازم يفتخر بيا وهوه بيقدمنى للناس باسمى مش بصلة قرابتى ليه....أنا اسمى مش عورة!!!!!!!