لو أنت خاطب.. اشترى شنطة رمضان لخطيبتك بحوالى 120 جنيها
لو خاطب أوعى تنسى تجيب شنطة رمضان لخطيبتك خصوصا لو دا أول رمضان يعدى عليكم بعد الخطوبة لأن أهلها هايفتكروا انك بخيل ورغم ظروف الشباب فى فترة الخطوبة نتيجة الالتزامات اللى عليهم من شقة وتوضيب إلا أن فى ناس كتير بتدقق فى تفاصيل صغيرة.
وعشان كدا" اليوم السابع" بيقدم لك مكونات شنطة رمضان لخطيبتك وعلى أد الإيد وهى أى نوع من المكسرات عشان يعرفوا انك كريم ومش هاتستخسر فى بنتهم وجبتلها أغلى حاجة حتى لو ربع كيلو من أى نوع مكسرات تكون خطيبتك بتحبه ودى هاتكلفك حوالى 30 جنيها.
وأوعى تنسى البلح.. اشترى كيلو بلح ناشف ودا هايتكلف حوالى 10 جنيهات ولفة قمر الدين بحوالى 25 جنيها ونصف كيلو زبيب بحوالى 20 جنيها ولفة تين بحوالى 15 جنيها ونصف كيلو مشمشية بحوالى 20 جنيها.