عبد الباسط محمد يكتب: خط الاستواء
أحــلامنا دابت م السفـر
وقلوبنا صدت م الفراق
كرمش جـبينا واتحـفـر
فوق منه خط الاستواء
شوف اختفاء بعض الحروف
م اللسان وســط الكلام
شبورة ف الرؤية وعزوف
للخطوة تمشى للأمام
خـتام لرحـلة الآلام
ونفس مش قابلة الرجوع
من فقر ذودها اعتصام
ع الرزق من أول سبوع
دموع بتجرى ع الخدود
على عمر عدى راح هدر
ضاع الشباب بره الحدود
والنومة على سن الحجر
أثر لجرح قديم غويط
على خربشة بدفر حياة
ف عنيّا بتعيد الشريـط
وهو يترجى النجـــاة
وياه بتصـرخ جـتتـى
وعضمتينى اللى أتبروا
ما بين شقايا ف غربتى
وأحلام ف وهم أتكسروا