سامح لطف الله يكتب: حبيبتى يا مصر
هصلى الشفع واستغفر
واصلى الوتر
وهدعيلك كدة بحرقة
تعيشى يا مصر
ملايكة ربى هتأمِّن
لحد الفجر
وتطلع شمسك الدهبي
وتنهى الصبر
يا جنة روحى مشتاقلك
تعودى يامصر
ولا نشوفه اللى بيقطَّع
ف لحمك جزر
ولا نشوفه اللى بيبيعك
لأرخص سعر
ويدوَّرْ ويضحك لك
ويضرب غدر
وندر على لأحميكى
وهو فى الندر
هصلى الشفع واستغفر
واصلى الوتر
وهدعيلك كدة بحرقة
تعيشى يا مصر
ملايكة ربى هتأمِّن
لحد الفجر