د.صبرى إسماعيل يكتب: حلم جديد
ومرّ العام ومن قبله كتير أعوام
وناس بالحب يقظانة وناس بتنام
وناس بالظلم وجعانا وبالأوهام
وبين الدنيا والدنيا حروف وكلام
وناس تبنى بأحلامها سنين المجد
وغيرها بيجرى بالتوهة وغاوى الهد
وناس بسلوكها مشبوهة ولا تترد
نتوه بيها تتوّهنا وتزرع صد
ومرّ العام ما بين العقل والتجهيل
صواعق فى الوغى ترمى صراخ وعويل
ويُتم وحزن يتألّم وصف طويل
وكلمة شر أكذوبة تهين الجيل
تعالوا يابنى الإنسان لحلم جديد
ونهجر كلّ ماضينا بعهد سعيد
ونبنى بجد دنيانا عسانا نفيد
ونرضى ربنا بينا وبالتحديد