"ارسم صورتك بالكارتون ببلاش".. مش "فيروس" دى هدية من "محمود" لمتابعيه
"ارسم صورتك بالكارتون ببلاش".. اعتادنا أن نتجاهل هذه العبارة حين تظهر على صفحة "الهوم" أمامنا أو يرسلها أحد الأصدقاء على "الفيسبوك" فى "كومنت" على اعتبارها "فخ" يقودك إلى "فيروس" محقق، لكن "محمود قدرى" طالب كلية الآداب بجامعة القاهرة، العاشق للتصميم، قرر أن يحول الخدعة إلى حقيقة ويسخّر عشقه وإتقانه للتصميم ليسعد رواد الفيسبوك من خلال رسم صورهم بالكارتون بشكل مجانى ويمارس هوايته المفضلة فى نفس الوقت.
يحكى قصة تعلمه للتصميم باستخدام الحاسوب قبل 3 سنوات: "قصة التصميم بدأت معايا لما كنت مشترك فى إدارة صفحة فريق بلاك تيما ومن منطلق حبى للفريق كنت حابب أصمم لهم كفرات للصفحة، واتعلمت من هنا التصميم وطورت من نفسى"، أما قصة تصميم صور الكرتون لأصدقاء الفيسبوك فيقول عنها: "فكرت من شهر واحد أجمع كل شغلى فى صفحة واحدة وبعد ما وصلت لـ1000 مشترك قررت أقدم هدية للناس اللى اشتركوا فى صفحتى وأرسم لعدد منهم صورته بالكارتون مجانا".
رسم الصورة بالكارتون كان يستغرق من محمود فى البداية 3 ساعات على الأقل لكن مع التعود أصبح الأمر أكثر سهولة وإتقانا ويتحدث عن هوايته المفضلة :" مش محتاج يكون عندك موهبة فى الرسم لأنى أكتر حد فى الدنيا مبيعرفش يرسم لكن تكون بتحب التصميم وبتعرف تتعامل مع البرامج المختلفة والرسم هنا بيكون بالماوس من خلال البرامج دى ومع الممارسة بتزداد خبرتك ومهارتك فى الرسم على عكس الرسم على التابلت بالقلم مثلا بيحتاج لموهبة فى الرسم".
محمود قدرى طالب الآداب العاشق للتصميم
رسوم الكارتون
تصميمات محمود
نماذج من تصميمات محمود