بالفيديو.. نجيب ساويرس يطالب بالإفراج عن صحفى "الجزيرة" محمد فهمى
طالب رجل الأعمال نجيب ساويرس، عبر فيديو له على موقع اليوتيوب، بإطلاق سراح صحفى الجزيرة الإنجليزية محمد فهمى المحكوم عليه بـ7 سنوات فى القضية المعروفه إعلامياً بـ"خلية الماريوت".
وقال ساويرس فى هذا الفيديو: "فى البداية أنا أحاول أساعد إنسان مقتنع أنه برىء وهو الأخ محمد فهمى.
وأضاف: "أنا أعرف محمد فهمى لما كان بيشتغل فى الـ"سى إن إن" وهو إنسان مجتهد وجاى من عائلة مصرية أصلية وأجداده فيهم اللى كان فى البوليس وفى القضاء، ولا يمكن محمد يكون داخل فى أى عمل يضر بمصر، فهو مصرى صميم شارك فى ثورة 25 يناير وكان معانا فى 30 يونيو ضد الإخوان، مش ممكن النهاردة يزج باسمه فى موضوع يتعلق بجماعة الإخوان المسلمين".
وتابع "ساويرس": أنا بقول كده عن قناعة وبرضى ضميرى لأنى حاسس أنه إنسان مظلوم واتحط ظلما فى الموضوع ده، مفيش حد يختلف أن قناة الجزيرة دى تحريضية، لكن صعب نعاقب كل واحد لمجرد أنه كان بيشوف أكل عيشه وعايز يبنى مستقبله، هو كان داخل على جواز وبيدور على مستقبله لمجرد أنه اشتغل فى المكان ده، لأنه لو حد متابع الحالة هو عارف إن هو أدان الكثير من ممارساتهم، ورفض الضغوط الخارجية كلها وقال: أنا عايز بلدى هى اللى تنصفنى".