سامح لطف الله يكتب: أنا دوغرى
أنا عمرى ما كنت ملاك
عندى الأخطاء بالجملة
ولا دُبْت ف بحر هواك
ورسمت عليك دى العَمْلَة
سبّلت وقلت أهواك
وكِيُوتْ أمورة وكاملة
أنا دوغرى وبنت أصيلة
أكنُس وأطبُخْ أنا شاملة
ولاَ أصغَّرْ وِدْن الفيل
ولاَ أكبَّرْ عين النملة
وِبَظبَّط كُلّ عواطفي
وبَهَنْدِسْ كُلّ معاملة
إيَّاك هتقرَّبْ مني
وتاخدنى ف دوكة مجاملة
تحكيلى قصص روايات
تِرْسِمْلى قصور ع الرملة
أنا أفَلْتَرْ كُل كلامك
ما تعدِّى منى النملة
إن كنْت رايدنى صحيح
مش جَى يا حبيبى تَتْسَلَّى
وِتقوللى أنتِ نفرتيتي
هَبْنيلك أحلى مِسَلَّة
إدينى قفاك ورِّيني
مَسّكنى حروف العلة
ياتْقوللى كلام م الآخر
وتضُمْ صورتنا مجلَة
يا تْرَوَّح يا ابنى على أمَّك
تِغْسِلْ رِجليك فى الحلَّة