د. صبرى إسماعيل يكتب: غراب
غراب بعـيد فى العلا فوق عـشّهم بيطير
شاهد على ظلمهم ما شاف فى يومه خير
يُصرخ بصوته الغبى يمكن يكـون تحذير
أتاريه عيونه شديدة متوقعة التدمير
ومهما طال الزمن الباغى عمره قـصير
حتماً يحاسبه الإله اللى حسابه عسير
**********
غراب مريض يرتعش قاعد كئيب محزون
لمح طيور فى السما {أربع} ما ليها عيون
فاردة جناحها وطايرة ما يهمّها اللى يكون
بأعلى صوته نده {يا ناااس يا هـووه أصحوا}
ما حدّ صدّق كلامه ولا رقصه كالمجنون
فجأه النيران ولّعت فى أعلى مبانى الكون
والتالتة دخلت بجرأة فى اللى اسمه بنتاجون
بوشهم تركها وهرب صار عقله كلّه ظنون
***********
قالوا بن لادن عملها والقاعدة فى كابول
وامريكا أخذت قرارها مين اللّى معنا يقول
يا طالبان سـلموا إمّا الردى الموصول
رفضـوا وقالت أميركا للحرب دقّى طبول
أعلن جنود العرب ليه الشرور بتصول
دا العنف بالعنف يقوى يشتد عوده يطول
لو يوم تعود أرضنا مع إبننا المغلول
ما نشوف فى يوم اغتيال ولا إحداشر أيلول