سامح لطف الله يكتب: عايز دعوة
عايز دعوة
ماليش دعوة
وعدى بسرعة يادا العام
معايا شهادة بالعشرة
عشان عِشرة وحب هيام
ولو طايل كمان أكتر
هجيب أكتر
دا آخر قرش فى جيبى
ومش هفطر
هصوم لجلك
هقوم لجلك
دانا نجلك
وابوس رجلك
وهرفع رايتك العالية
حبيبتى يا مصر
ما ليش دعوة فى يوم فرحك؟
فى يوم النصر
مازال عنوانى ع الرملة
هنا ع الشط
مازال دمى هنا ف جوفك
حروف تتخط
عايز دعوة
مسحت خلاص ماليش دعوة
دانا الداعى
وأنا المدعو لحفر الشط