بيقولك مبارك كان حرامى وفاسد بس مش خاين!!!

كتبت إسراء عبدالفتاح الجمعة، 22 أغسطس 2014 01:22 م

اللى يتحكم عليه بـ3 سنوات بالسجن فى قضية قصور الرئاسة يعنى إيه؟ يعنى سرق شعبه وخانه وجوعه علشان هو وعائلته يعيشوا فى قصور باهظة الترف، خان شعبه وهدم أجيالا بتعليم فاسد أو تعليم غير موجود من أساسه، خان شعبه لما وصل نسبة الفقر والأمية لـ%40، وبفساده وفساد حكومته ورجاله وأهل ثقته تولع قطارات، وتغرق عبارات، وتموت ناس عايشة فى أماكن عشوائية تحت خط الفقر «ولن ننسى أهالى الدويقة»، بوزيره يوسف والى دخل السرطان البلد، وأصبحنا من أكبر دول العالم إصابة بمرض السرطان، ولسه حتى الآن بنعانى من هذا المرض بسبب انعدام ضميره وخيانته لأهله وناسه وشعبه هو وحكومته، وناس غلابة من الشعب بتدفع ثمن مرض بشع وقاتل ومدمر للنفسية قبل الجسد.

وبفساده وخيانته لشعبه ومحاصرته لهم رعى وكبر تيار الإخوان الإرهابى 30 سنة، ويعقد معاهم صفقات، ويدخلهم البرلمان، ويديهم 88 مقعدا برلمانيا، ويفتح لهم الجمعيات الخيرية اللى بيتمولوا منها من بره ويجيبوا بها سلاح، ويكبروا ويترعرعوا ويعملوا أكبر تنظيم إخوانى فى منطقة الشرق الأوسط، ويجهزهم يكونوا البديل علشان شعبه يختار بين الحرامى والفاسد والديكتاتور، وبين الإرهابى القاتل الفاشى علشان يثبتلك إن كله مرار فى مرار، ويخلى كل اختيارات شعبه ذل وجوع وجهل.. فطبعا يفضل قاعد وقاعد لأنكم لو فكرتوا تشيلوه، مش هيكون قدامكم غير الإخوان اللى هو رباهم وكبرهم علشان يبقوا البعبع اللى يخوفكم بيه لو فكرتم تسقطوه وافتكروا «لأنا للفوضى» الإخوان بالنسبة ليه ولنظامه هم البديل اللى هيخليكم تترحموا عليه زى ما بتعملوا دلوقتى وتنسوا إنه هو اللى عمل الإخوان طول السنين اللى فاتت وهو اللى سمح لهم يرفعوا شعار «الإسلام هو الحل» فى كل الانتخابات فى عهده، وهو عارف إنهم إرهابين وقتلة ونظام فاشى لأنه تخيل إن هو ده اللى هيحمى وجوده فى السلطة، فلما وقع اتخميتوا وقلتوا نجرب بتوع الدين اللى هو سمحلهم ينظموا نفسهم ويدخلهم تمويل علشان تتخدعوا فيهم، رسم السيناريو هو ونظامه وجهز لشعبه المصيدة ووقعنا فيها وده كان جزاءنا اللى هو محضره لينا علشان فكرنا نتخلص منه ومن فساده وديكتاتوريته، فكان بيجهز لنا العقاب لو تمردنا ورفضنا فساده وخيانته وظلمه وديكتاتوريته،،، إيه رأيكم ده مش خيانة!!!!! طيب إيه ده بطولة!!!!!

قتل كل فرص لظهور كوادر وقيادات، لغى أى حاجة اسمها الصف الثانى أو القيادة المتوسطة العمر، اغتال النوابغ معنويا، قتل روح القيادة تجاه من فكر أن يحييها بداخله، جرف المواهب، اخترق المعارضة المدنية واتجسس عليها علشان يتمكن من هدها من الداخل، حبس واعتقل اللى يقدر عليه، وعذب المعارض وحتى اللى فى حاله مترحمش من التعذيب عن طريق رجالته، رجالة العادلى، الحمل الوديع، ونفى وهجر العلماء والمبتكرين وأصحاب الجوائز العالمية، خلق معارضته الديكورية المطبلاتية، واللى استمروا فى التطبيل كمهنة بعد ما اكتشفهم مبارك،،، ويا ترى ده فى نظركم بطولة ولا خيانة!!!!!

منتهى الصدق إنك تحكم البلد 30 سنة، وتغير الدستور على مزاجك علشان تمسك فى الكرسى بإيديك وسنانك، وبعدين تقولنا لم أكن يوما ساعيا لسلطة أو جاه. وكمان تقولنا مشيت طواعية!!! طواعية راح فيها شباب زى الورد، طواعية راحت فيها نور عين أجدع شباب فى مصر!!! طواعية إيه بس ده!!!! يا راجل اختشى وعيب على سنك!!!!

الخيانة هى خيانة الوطن والتراب والشعب،،،، فاللى خان شعبه خان بلده،،،،،،

اقرأ أيضا

أحمد فتحى: مالقتش صاحب جدع وكله بيعرفنى علشان مصلحته


الزمالك يوقع عقود بيع محمد إبراهيم لماريتيمو البرتغالى


بالصور.. انفراجة للبعثة المصرية فى نانجينج


مدير الكرة بكريستال بالاس يستقيل لتورطه فى فضيحة عنصرية وجنسية


مرتضى منصور يقاضى أحمد فتحى بتهمة النصب


شبح”إيبولا” يهز عرش الرياضة


رسميا.. الزمالك يستغنى عن خدمات إسلام عوض


صور ..فان بيرسى يدخل قائمة مانشستر يونايتد لمواجهة سندرلاند


لاعب الزمالك الجديد: العائق المادى وراء عدم انتقالى للأهلى