عبد الحميد بدوى يكتب: عم شمحوت
عم شمحوت جايب لزبون
ميت طوبة على متر رمل
فى عز الشتاء والعوصة والبرد
والدنيا عتمة كحل
وكل شوية العربية تغرز فى الوحل
ينزل عم شمحوت يزق
وعيشة غلب فى غلب
وأنا جاى من البلد بأقوله
بعد السلام والتحية
إية اللى رماك على المر ؟
قلى الأمر
قلتله العيب فى الفقر ؟
قلى الفقر عمره ما كان عيب
وزى ما فيه ناس فقيرة فى ناس غنية
وزى ما فيه بشاوات فيه عربجية
المشكلة مش فيا
المشكلة فى ابنى
اللى حنى ضهرى لحد ما خد الكلية
هايلف يلف ومش هايلاقى
غير الحمار والعربية
ضحكت وقلتله وهو عربجى شوية؟؟؟؟؟؟
قلى هو فيه حد مغروز فى الطين
علشان جوز جينهات إلا العربجية
هو فيه حد كل راس ماله حمار وعربية
قلتله ياعم شمحوت ربنا يهون عليك وعليا
قلى كل المشكلة أنا مش عارف ليه علمته
وليه خد الكلية ؟
قلتله أهو يبقى عربجى مؤهلات عليا
وبكرة يبقى عربجى قد الدنيا