د.صبرى إسماعيل يكتب: رسالة من جندى إلى أمّه
يا امّايا خلّى الصورة تذكارى
واحكى تاريخى كلّه لعيالى
طول عمرى شايل روحى على كفّى
باحمى بلادى إن وباء جالى
برّه وجوّه الشرّ مستنى
ربى ياعالم أنت بأحوالى
ماكان فى ظنّى اللى هيخوننى
منّى وحالف يبقى أهوالى
****
مرّة يا أمّى واحنا بنصلّى
ساعة فطور الخلق فى رمضان
يطلع علينا رتل متغمّى
وكأنه جيش الغدر كالبركان
ولقيت رصاصة ميّلت يمّى
وإخوانى سال الدم كالطوفان
كانت عيون الجهل جوّاها
والرطن عربى وابن بلدى خان
******
أما فى الشهر الحرام يا أمّى
طلعت دانات الشر فى العدوان
فى هجرة المصطفى اللى حفظ دمّى
والسلم زاد الدنيا فى القرآن
النار تولّع حتى ما يسمّى
ولا ترحم اللى يحرسوا الأوطان
فرفعت يدّى أشكى له همّى
اللى خلقنا ربنا الرحمن