أيمن ماهر يكتب: كله بايع
زمن المحبة ضاع وكله خون كله
والود ما بينا هان وكله بايع كله
لا أخ قاعد على حاله
ولا صاحبى بخطر على باله
الكل باعنى بالرخيص
وأنا اللى شارى كله
عمرى ما فهش غير مرار
ضاع زمن الحلاوة
نارى عايشها ليل نهار
قلبى دافعها إتاوة
ولا حد حاسس بيا
أنا خلاص فاض بيا
امتى ألاقى يا دنيا قلب
يمسح دمعة عنيا
زمن المحبة ضاع ولا أنا اللى متهيئ لى
بدور ع الحنان مابين حبايبى وأهلى
والكل قافل بابه
وقلبى عاش عذابه
ولما لقيت يا دنيا حبيبى
طلعت مش فى حسابه
لا أخ قاعد على حاله
ولا صاحبى بخطر على باله
الكل باعنى بالرخيص
وأنا اللى شارى كله